Amcan y cwrs ydi cyflwyno myfyrwyr i’r Diwydiant Hamdden Awyr Agored, rhoi cyfle iddyn nhw ddysgu sgiliau perfformiad personol, sgiliau hyfforddi a dealltwriaeth o fyd hamdden awyr agored. Bydd y myfyrwyr yn cael cyfle i ddatblygu sgiliau fydd yn eu galluogi i geisio am gymwysterau Cyrff Rheoli Cenedlaethol.

Mae’r cwrs yn seiliedig ar waith prosiect ac mae posib arbenigo mewn peirianneg forwrol neu beirianneg cyffredinol. Bydd angen cwblhau 18 uned o waith yn cynnwys peirianneg electroneg, dylunio graffeg (CAD), cynnal a chadw peiriannau, weldio ac iechyd a diogelwch. Mae’r cwrs yn datblygu sgiliau sy’n paratoi'r myfyrwyr ar gyfer byd gwaith, prentisiaeth a, gyda’r pwyntiau angenrheidiol, ar gyfer prifysgol. Mae’r Diploma cyfwerth a 3 Lefel A.

Mae posib i fyfyriwr gwblhau Prentisiaeth Peirianneg Morwrol ac ennill cymwysterau mewn gwaith Adeiladu a Thrwsio Cychod drwy ddilyn y cwrs coleg a gweithio gyda chyflogwr ar yr un pryd. Mae’r myfyrwyr yn astudio ar gyfer NVQ a Thystysgrif Technegol ac yn dysgu Sgiliau Allweddol gofynnol y diwydiant. Mae posib dechrau’r brentisiaeth ar Lefel 1 a gweithio i fyny i Lefel 3 dros gyfnod o dair blynedd.

Cwrs newydd llawn amser 2 flynedd o hyd ar gyfer y rhai sydd am feithrin gwybodaeth gadarn o feysydd gwyddor chwaraeon ac addysg awyr agored drwy ennill cymhwyster cenedlaethol. Mae’r Coleg yn rhedeg y cwrs mewn partneriaeth â Phrifysgol Cymru Bangor a Chanolfan Cenedlaethol Chwaraeon D?r Plas Menai. Ar ôl cwblhau’r HND gall myfyrwyr fynd ymlaen i ddwy flynedd bellach yn y Brifysgol a gradd mewn Gwyddor Chwaraeon.

Mae hon yn gwrs sy’n cynorthwyo myfyrwyr i ddatblygu dealltwriaeth o Wyddorau Chwaraeon ac Ymarfer Corff drwy waith a phrofiad ymarferol. Mae’r meysydd astudiaeth yn cynnwys ffisioleg, seicoleg, biomecaneg, hyfforddi, chwaraeon ymarferol, a hyrwyddo iechyd ac ymarfer corff. Bydd y myfyrwyr yn dysgu am swyddogaethau’r gwyddonydd chwaraeon ac ymarfer corff ac am broffesiynau cysylltiedig drwy amrywiaeth o brofiadau ymarferol a chymwysedig. I gyd-fynd â’r pwyslais ar fywyd iach a chorfforol weithgar, bydd y myfyrwyr yn dysgu am bwysigrwydd ymarfer corff o ran gwella iechyd corfforol a meddyliol; mae’r rhaglen hefyd, serch hynny, yn cadw’r pwyslais ar berfformiad sy’n gysylltiedig ag astudiaethau gwyddor chwaraeon mwy traddodiadol.

Manylion: Mae hon yn gwrs Gradd sy’n darparu ystod gynhwysfawr o sgiliau academaidd, ymarferol a galwedigaethol ar gyfer ei myfyrwyr mewn maes sy’n tyfu’n sydyn. Mae yna bwyslais cryf ar y gweithle ac mae myfyrwyr yn cael cyfle i gysgodi gweithwyr yn y Sector Datblygu Chwaraeon Cymunedol, i weithio ar leoliad gwaith, neu weithredu fel ymgynghorydd yn datrys problemau a materion cysylltiedig â’r gweithle. Gall y myfyrwyr ddewis dilyn llinyn Astudiaethau Ieuenctid neu linyn Addysg, neu gymryd modiwlau Hyfforddi Chwaraeon. Pa bynnag gyfeiriad bydd y myfyrwyr yn eu dewis mi fyddan nhw’n graddio gydag ystod amrywiol o’r sgiliau y mae’r diwydiant datblygu chwaraeon yn gofyn amdanyn nhw. Mae hon yn radd sydd wedi ei hanelu at fyfyrwyr sydd am ddilyn gyrfa ym maes datblygu chwaraeon, ond bydd hefyd yn cymhwyso myfyrwyr gyda’r sgiliau sydd eu hangen i gymryd swyddi ym maes cysylltiadau cymunedol, cynlluniau chwaraeon dinesig a chefn gwlad, gweithgareddau pobl ifanc, hyrwyddo iechyd, hyfforddi chwaraeon a mynediad i TYDR (yn dibynnu ar eu dewisiadau).

Mae hon yn Radd sy’n darparu ystod eang o wybodaeth fydd yn berthnasol i yrfa ym myd Hamdden mewn cyd-destun amgylcheddol megis chwaraeon cefn gwlad, Parciau Cenedlaethol, rheoli ardaloedd gwarchodaeth a mynediad i gefn gwlad. Mae’r myfyrwyr yn astudio agweddau academaidd a galwedigaethol o reoli amgylchedd, treftadaeth, rheoli gweithgareddau hamdden a chadwraeth mewn cyd-destun Ewropeaidd. Mae’r dewisiadau sydd ar gael yn rhoi cyfle i’r myfyrwyr arbenigo. Mae’r cwrs ar gael drwy gyfrwng y Gymraeg (os oes yna o leiaf 7 yn y dosbarth). Côd cwrs UCAS: FN92 BA/LEM

Cwrs sy’n cael ei rhedeg ar y cyd â Choleg Menai, ac sy’n addas ar gyfer y rhai hynny sydd am sicrhau cefndir addysgol cadarn ym meysydd gwyddor chwaraeon ac addysg awyr agored drwy ennill cymhwyster cenedlaethol. Mae’r Ganolfan Chwaraeon D?r Cenedlaethol, Plas Menai, 4 milltir yn unig o Fangor, yn cyfrannu’n sylweddol at y cwrs. Bydd myfyrwyr sy’n dilyn y cwrs yn cael cyfle i ennill cymwysterau eraill, yn cynnwys Cymorth Cyntaf a gwahanol gymwysterau hyfforddi, fydd yn ehangu eu gwybodaeth ac yn cynyddu’r tebygrwydd o gael swydd. Bydd cwblhau’r cwrs HND yn llwyddiannus yn rhoi mynediad i ail flwyddyn gradd BSc Anrhydedd y Brifysgol mewn Gwyddor Chwaraeon. Er mai rhaglen cyfrwng Saesneg ydi hon, bydd rhannau ohoni ar gael yn ddwyieithog, gydag asesiad llafar ac ysgrifenedig ar gael yn y Gymraeg i’r rhai sy’n dymuno hynny. Bydd cefnogaeth tiwtor personol ar gael yn newis iaith y myfyriwr ar hyd y cwrs.

Gradd sy’n cynnig cyfle i astudio tri maes gwyddor chwaraeon, iechyd ac addysg gorfforol. Mae o’n baratoad da ar gyfer gyrfa yn y diwydiant ffitrwydd ffyniannus, ar gyfer dysgu addysg gorfforol (wedi hyfforddiant TYDR) neu yrfa ymchwil mewn amrywiaeth o feysydd cysylltiedig â chwaraeon ac iechyd.

Cwrs ar gyfer myfyrwyr meddygol sydd wedi cwblhau trydedd flwyddyn yn yr Ysgol Feddygol yn llwyddiannus ac sydd am ennill gradd BSc mewn Gwyddor Ymarfer Corff.

Gradd sydd wedi ei drefnu ar gyfer y rhai sydd am gyfuno astudiaethau Chwaraeon, Iechyd ac Addysg Gorfforol gyda Seicoleg.